سالي

السلام عليكم جميعا

هذي خمس ألغاز متفاوتة في درجة صعوبتها... و برضه مختلفة في طبيعتها.. بعضها تفكير منطقي و بعضها حسابي.. و هكذا
اللغز الأول:

رجل يريد أن يشتري لزوجته في عيد ميلادها خاتم مرصع بالجواهر... لما راح للجواهرجي.. لقى الخاتم اللي فيه 4 أحجار فيروز و حجر ألماس قيمته ألفين ريال... و لقى الخاتم اللي يحتوي على 3 أحجار عقيق و حجر فيروز و حجر ألماس بقيمة 1400 ريال... و لما بص في الشباك اللي في اليمين لقى خاتم فيه حجرين ياقوت و حجر ألماس و قيمته 3 آلاف ريال...

(عذرا لإستخدام عملة الريال و ليس الجنيه أو الدرهم أو الدينار... و لكن صدقوني فرق العملة مش هيغير من حل السؤال )

الرجل و زوجته لديهم أربع أبناء.. أساميهم: عادل، أحمد، فاروق، و ياسر... فهو حب يشتري خاتم فيه أربع أحجار كل حجر يرمز لأحد الأولاد (الحرف الأول من الإسم)...

السؤال/ كم ستكون قيمة الخاتم؟
-------------------------------------------------------------

اللغز الثاني:

0
10
1110
3110
132110
1113122110
311311222110

الأعداد السابقة محطوطة تبعا لمنطق معين... إعتمادا على نفس المنطق.. ما هو العدد اللي المفروض يتكتب في السطر الثامن؟
-------------------------------------------------------------

اللغز الثالث:

أنا من يومين شفت الحاج أبو محمد جارنا.. راجل طيب قوي.. قعدت أدردش معاه.. و هو بيشتكيلي من الروماتيزم و هشاشة العظام و السكر و الضغط و المية البيضاء و قرحة المعدة و الديسك و الحصى في الكلى و الصداع النصفي و.. و.. و... قلت له: بس بس كذا يا حاج ابو محمد.. انت منتهي الصلاحية خاااالص... ربنا يديك الصحة و العافية و طول العمر... الا على فكرة يا حاج انت عندك كم سنة؟
راح الحاج أبو محمد قال: هو عمر حفيدي بالأيام يساوي عمر إبني محمد بالأسابيع... و في نفس الوقت عمر حفيدي بالأشهر يساوي عمري بالسنيين... و إحنا الثلاثة مجموع أعمارنا 100 سنة...
الله ده المخ لسه شغال زي الفل يا حاج أبو محمد.. أمال انته بتشتكي من إيه؟

السؤال/ كم عمر الحاج أبو محمد؟
-------------------------------------------------------------

اللغز الرابع:

عندنا المعادلة التالية

987654321 = 100

طبعا هذي لحد دلوقت مش معادلة لأن الطرفين مش متعادلين.. و لكن المطلوب اننا نعمل منها معادلة صحيحة بإضافة علامات الجمع و الطرح فقط (يعني 1+23-54-6+87+9.. طبعا في المثال المجموع مش 100 و لكن هذا للإيضاح فقط).. و لكن هناك شرطين:

الأول: إستخدام أقل عدد من علامات الجمع و الطرح
الثاني: أن تبقى الأرقام بنفس الترتيب التنازلي من 9 إلى 1.. يعني ما فيش امكانية لإعادة ترتيب الأرقام..
-------------------------------------------------------------

اللغز الخامس:

مهندس معماري شاف في إحدى رحلاته للخارج مدينة نموذجية جدا و أعجبه النظام العمراني و طريقة تنظيم المباني... بعد رحلته بعدة سنوات اتعين المهندس المسؤول لإنشاء مدينة نموذجية جديدة في بلده... طبعا صاحبنا تذكر المدينة اللي شافها في الخارج و حب انه يعمل زيها... هو فاكر كل حاجة تقريبا... بس اللي محيره حاجة واحدة بس...

هو كان في الشارع الرئيسي في المدينة 8 مبان أساسية بس هو مش فاكر ترتيبهم كان إزاي... هو كل اللي فاكره التالي:

السجن كان جنب مبنى البلدية
مبنى التأمينات الإجتماعية على بعد مبنى واحد من البنك
المدرسة على بعد مبنيين من المسرح
البنك يقع في مكان ما على يسار الفندق
مبنى التأمينات الإجتماعية مجاور للمدرسة
الفندق مجاور للمسرح
المسرح يقع على بعد ثلاثة مبان من مبنى التأمينات الإجتماعية
البنك مجاور للفندق
المجمع التجاري يقع في أقصى اليسار

المطلوب/ معرفة ترتيب المباني في الشارع الرئيسي..
-------------------------------------------------------------

و أتمنى لكم أوقات ممتعة

تحياتي

__________________